၉၀-၁၀ နိယာမ

၉ဝ-၁ဝ နိယာမ
------------------

၉ဝ-၁ဝ နိယာမက သင့်ဘဝကို ပြောင်းလဲလိမ့်မယ်။ (အနည်းဆုံးတော့ သင့်ရဲ့တုံ့ပြန်မှုကို ပြောင်းလဲလိမ့်မယ်)

၉ဝ-၁ဝ နိယာမဆိုတာ ဘာလဲ...

ဘဝရဲ့၁ဝ%က သင့်ရဲ့ကံကြမ္မာကြောင့်ဖြစ်တယ်။ ကျန်တဲ့ ၉ဝ%က သင့်ရဲ့တုံ့ပြန်ချက်အပေါ် မူတည်တယ်။

ဒါ ဘာအဓိပ္ပာယ်လဲ... ကံကြမ္မာကြောင့်ဖြစ်လာတဲ့ ၁ဝ%ကို ကျွန်တော်တို့ မထိန်းချုပ်နိုင်ဘူး။

ကားပျက်တာ၊ လေယာဉ်နောက်ကျတာ၊ ကားပိတ်ဆို့တာတွေကို ကျွန်တော်တို့ မထိန်းချုပ်နိုင်ဘူး။ ဒါပေမယ့် ကျန်တဲ့ ၉ဝ%ကိုတော့ ကျွန်တော်တို့ဆုံးဖြတ်နိုင်တယ်။

ဘယ်လိုဆုံးဖြတ်မလဲ... သင့်ရဲ့တုံ့ပြန်မှုပေါ်မှာပဲ မူတည်ပါတယ်။

ကားမီးနီသွားတာကို သင်မထိန်းချုပ်နိုင်ဘူး။ ဒါပေမဲ့ သင့်ရဲ့တုံ့ပြန်မှုကို သင်ထိန်းချုပ်နိုင်ပါတယ်။ တခြားသူ အရူးလုပ်တာကို မခံပါနဲ့။ ဘယ်လိုတုံ့ပြန်မယ်ဆိုတာကို သင်ထိန်းချုပ်နိုင်ပါတယ်။

ဥပမာတစ်ခုပြရရင်....

သင်နဲ့ သင့်မိသားစု မနက်စာစားနေတယ်။ သင့် သမီးငယ်က ကော်ဖီခွက်ကို သင့်အင်္ကျီအပေါ် မတော်တဆလောင်းမိတယ်။ ဒါက သင်မထိန်းချုပ်နိုင်တဲ့ အဖြစ်တစ်ခုဖြစ်တယ်။ နောက်ထပ် ဘာဆက်ဖြစ်မယ်ဆိုတာက သင့်ရဲ့တုံ့ပြန်မှုပေါ်မှာ မူတည်တယ်။

သင် စဆူပြီ.... သမီးကို သင်ဆူဆဲပစ်လိုက်တယ်။ သမီး ငိုယိုတော့တယ်။ အဲဒီနောက် သမီးကိုဆူဆဲနေရာက မြှားဦးကို ဇနီးဖက် သင်လှည့်လိုက်တယ်။ ကော်ဖီခွက်ကို စားပွဲစွန်းမှာတင်ထားခဲ့လို့ဆိုပြီး သင်ဆူဆဲတယ်။ တစ်ဆက်တည်းမှာ အပြန်အလှန် အဆူအဆဲစစ်ပွဲလေး စတင်တော့တယ်။ သင် ဒေါသထွက်ထွက်နဲ့ အပေါ်ထပ်တက် အဝတ်အစားလဲတယ်။ အောက်ထပ်ပြန်ရောက်တော့ သမီးက ငိုငိုယိုယိုနဲ့ မနက်စာဆက်စားပြီး ကျောင်းသွားဖို့ အမြန်ပြင်တယ်။ ဒါပေမဲ့ ဘတ်စ်ကားက ထွက်သွားခဲ့ပြီ...

သင့်ဇနီးကလည်း အလုပ်ကို အမြန်ထွက်သွားတယ်။ သင်လည်း သမီးကို ကျောင်းပြေးပို့ရတယ်။ သင်ရုံး နောက်ကျမှာစိုးလို့ တစ်နာရီ မိုင်၃ဝပဲ မောင်းရတဲ့လမ်းမှာ သင် ၄ဝ နဲ့မောင်းတယ်။ ကားအမြန်မောင်းလို့ သင်ဒဏ်ငွေရိုက်ခံရတယ်။ အဲဒီလိုနဲ့ ကျောင်းရောက်တော့ ၁၅မိနစ်နောက်ကျနေခဲ့ပြီ။ သင့်သမီးက သင့်ကို နှုတ်တောင်မဆက်နိုင်ဘဲ အတန်းထဲပြေးဝင်သွားတယ်။ သင့်ရုံး ရောက်တော့ ၉နာရီ မိနစ်၂ဝရှိနေပြီ။ ရုံး ရောက်မှ သင့်လက်ဆွဲအိတ်မေ့ကျန်တာကို သတိရတယ်။ ဒါဟာ တကယ့်ဆိုးရွားတဲ့ နေ့တစ်နေ့ဖြစ်တယ်။ ဒီကနေ့ ကံမကောင်းပါလားဆိုပြီး အိမ်ကိုပဲ သင်ပြန်ချင်နေလိမ့်မယ်။ အိမ်ပြန်ရောက်တော့လည်း သင်နဲ့ ဇနီး၊ သမီးရဲ့ ဆက်ဆံရေးက အက်ကြောင်းလေးထနေလိမ့်မယ်။

ဒါ.. ဘာကြောင့်လဲ..
အရာအားလုံးက မနက်ပိုင်းမှာ သင်တုံ့ပြန်ခဲ့တဲ့ တုံ့ပြန်ချက်တွေကြောင့်ဖြစ်တယ်။

ဒီလို ဆိုးရွားတဲ့နေ့တစ်နေ့ ဘာဖြစ်လို့ ဖြစ်ခဲ့ရသလဲ

(၁) ကော်ဖီကြောင့်
(၂) သင့်သမီးကြောင့်
(၃) ယာဉ်ထိန်းရဲကြောင့်
(၄) သင့်ကြောင့်

အဖြေက နံပါတ် (၄)ဖြစ်ပါတယ်။

သမီး ကော်ဖီမှောက်လိုက်တဲ့ကိစ္စကို သင်မထိန်းချုပ်နိုင်ဘူး။ ဒါပေမဲ့ အဲဒီကိစ္စအတွက် ၅စက္ကန့်အတွင်း သင်တုံ့ပြန်လိုက်တဲ့ တုံ့ပြန်မှုက သင့်ရဲ့ကံမကောင်းတဲ့နေ့ကို စတင်ခဲ့တာပါပဲ.....

အောက်ကစာက သင့်ကံကြမ္မာကို သင်ပြောင်းရေးတဲ့ရလာဒ်ဖြစ်တယ်။

သင့်ကိုယ်ပေါ် ကော်ဖီမှောက်သွားတယ်။ သင့်သမီး ငိုမဲ့မဲ့ဖြစ်နေတယ်။ ဒါကို သင်က နူးနူးညံ့ညံ့နဲ့ "သမီး.. ဘာမှမဖြစ်ဘူး.. နောက်တစ်ခါဆိုရင် သတိထားပေါ့" လို့ ပြောပြီး တဘက်ယူပြီး အပေါ်ထပ်တက်သွားတယ်။ အဝတ်အစားလဲပြီး ရုံးသွားဖို့ သင်အောက်ထပ်ဆင်းလာတယ်။ ပြတင်းပေါက်အပြင်ဖက် သင်လှမ်းကြည့်တော့ သင့်သမီးက ဘတ်စကားပေါ်ရောက်နေပြီး သင့်ကို လက်ပြနှုတ်ဆက်နေတယ်။ ရုံးကို သင် ငါးမိနစ်စောရောက်သွားပြီး လုပ်ဖော်ကိုင်ဖက်တွေကို သင် ရင်းရင်းနှီးနှီး နှုတ်ဆက်တယ်။ ပျော်ရွှင်ခြင်းနဲ့စတဲ့ သင့်ရဲ့နေ့သစ်တစ်နေ့တာကို သင့်အထက်လူကြီးက ကောင်းတဲ့မှတ်ချက်ပေးတယ်။

မတူတဲ့ခြားနားချက်ကို သင်သတိထားမိပြီလား၊

အစတူပြီး အဆုံးမတူတဲ့ ခြားနားချက်နှစ်ခုက ဘာကြောင့်ဖြစ်ရတာလဲ၊
သင့်တုံ့ပြန်ချက်ကြောင့်ဖြစ်တယ်။

ကံကြမ္မာကြောင့်ဖြစ်တဲ့ ၁ဝ%ကို သင်ထိန်းချုပ်နိုင်ချင်မှ ထိန်းချုပ်နိုင်လိမ့်မယ်။ ကျန်တဲ့ ၉ဝ%ကိုတော့ သင်တုံ့ပြန်မှုပေါ် အဆုံးအဖြတ်ပေးလိမ့်မယ်။

၉ဝ-၁ဝ နိယာမရဲ့ လက်တွေ့အသုံးပြုပုံတချို့ကို တင်ပြလိုက်ပါတယ်။

တကယ်လို့ လူတွေက သင်ကို မဟုတ်မမှန်ကြောင်းပြောရင် "ရေမြှုပ်တုံး"တစ်တုံးအဖြစ် မခံပါနဲ့။ သင့်ကို ထိခိုက်၊ တိုက်ခိုက်လာတဲ့စကားတွေကို ဖန်ထည်ပေါ်ကရေတွေလို စီးဆင်းသွားပါစေ။ အပျက်သဘောဆောင်ဝေဖန်ချက်တွေ သင့်ကို မရစ်နှောင်ပါစေနဲ့။

သင့်တင့်တဲ့တုံ့ပြန်မှုက သင့်နေ့ရက်တွေကို မပျက်စီးစေပါဘူး။ မှားယွင်းတဲ့တုံ့ပြန်မှုက သင့်ကို သူငယ်ချင်းမိတ်ဆွေ ဆုံးရှုံးစေတယ်၊ ဒေါသထွက်စေတယ်၊ စိတ်ဖိအားများပြီး အသက်ရှူ မွန်းကြပ်စေပါတယ်။

တကယ်လို့ လမ်းမှာ မော်တော်ကား ပိတ်ဆို့မှုတွေဖြစ်ရင် သင်ဘယ်လို တုံ့ပြန်မလဲ။
စိတ်တိုဒေါသထွက်မလား၊
စတီယာရင်ကို တဒုန်းဒုန်းထုမလား၊
ကျွန်တော့်မိတ်ဆွေတစ်ဦးက စတီယာရင် ပြုတ်ကျတဲ့အထိဖြစ်ဖူးတယ်။
သင် ဆဲဆိုမလား၊
သွေးတွေ ငယ်ထိပ်အထိ ထိုးတက်သွားမလား၊
တခြားကားကို တိုက်ပစ်ဖို့ စိတ်ကူးလား၊

ရုံးချိန် ၁ဝစက္ကန့်လေး နောက်ကျတာကို ဘယ်သူက သင့်ကိုဆူပူမှာလဲ၊ ပိတ်နေတဲ့ကားတွေကြောင့် သင်ရဲ့ စနစ်တကျမောင်းနှင်မှုကို ဘာကြောင့် ပျက်စီးစေမလဲ၊

စိတ်မပူပါနဲ့.... ၉ဝ-၁ဝ နိယာမကို သတိရလိုက်ပါ။

သင့်ကိုအလုပ်ဖြုတ်လိုက်ကြောင်း အကြောင်းကြားလိုက်ပြီ။
အိပ်မပျော်တာနဲ့ ဘာဖြစ်လို့ စိတ်တိုဒေါသထွက်ရမလဲ၊
ဖြစ်ပြီးနေတဲ့အရာပေါ် စိတ်တိုဒေါသထွက်နေမယ့်အစား အဲဒီအရာပေါ် သုံးဖြုန်းမယ့်အင်အားနဲ့အချိန်ကို တခြားအလုပ်သစ် ရှာဖွေဖို့ဆီ အာရုံလဲွှထားလိုက်ပါ!

လေယာဉ်နောက်ကျမှထွက်မယ်။ သင့်အစီအစဉ်ဆွဲထားတဲ့ ခရီးစဉ်တွေ ကမောက်ကမဖြစ်တော့မယ်။ ဘာဖြစ်လို့ သင့်ဒေါသ၊ သင့်မကျေနပ်ချက်တွေကို ဝန်ထမ်းတွေအပေါ် စုပြုံရမလဲ၊ အဖြစ်အပျက် မဖြစ်ပျက်ဖို့ သူတို့ဘယ်လိုမှ ထိန်းချုပ်လို့မရပါဘူး။

အဲဒီဒေါသ၊ မကျေမနပ်ရေရွတ်နေမယ့်အစား စာဖတ်နေလိုက်မယ်၊ ဒါမှမဟုတ် ခရီးသွားအချင်းချင်း မိတ်ဖွဲ့မယ်။ ဒေါသထွက်၊ စိတ်တိုတာက သင်ရဲ့တနေ့တာကို ပိုဆိုးစေပါတယ်။

၉ဝ-၁ဝ နိယာမကို သင်နားလည်သွားပြီဆိုရင် အခုပဲ လက်တွေ့အသုံးပြုလိုက်ပါ။ ထူးဆန်းအံ့သြတဲ့ ရလာဒ်ကို သင်ခံစားရပါလိမ့်မယ်။ အသုံးပြုလိုက်ခြင်းအားဖြင့် သင့်ကို ဘာမှ မဆုံးရှုံး၊ မနစ်နာစေပါဘူး။ ၉ဝ-၁ဝ နိယာမက မယုံနိုင်အောင် အစွမ်းထက်ပါတယ်။ ဒါပေမဲ့ ဒါကို လူနည်းစုလောက်ပဲ အသုံးပြုဖို့ နားလည်ကြတယ်။

သန်းပေါင်းများစွာသောလူတွေက နာကျင်ခြင်း၊ အစမ်းခံခြင်း၊ ပြဿနာနဲ့ ကြေကွဲခြင်းတွေထဲ နစ်ဝင်နေကြတယ်။ ဒါကြောင့် ၉ဝ-၁ဝ နိယာမကို ကျွန်တော်တို့ နားလည်ပြီး လက်တွေ့ကျကျ အသုံးပြုဖို့ လိုအပ်တယ်။

ဒီနိယာမက သင့်ဘဝတစ်သက်ကို ပြောင်းလဲနိုင်ပါတယ်။

လောကမှာ ၈ဝ%သော ဥစ္စာပစ္စည်းတွေကို ၂ဝ%သော လူတွေက ရှာဖွေပိုင်ဆိုင်လိုက်ပြီ။ ကျန်တဲ့ ၂ဝ%သော ဥစ္စာပစ္စည်းတွေကို ၈ဝ%သော လူတွေက လုယှက်နေကြတယ်။ နေ့တိုင်း ၈ဝ%သောလူတွေက သူရ ငါရနဲ့ လုနေကြပေမယ့် မရောင့်ရဲ၊ မတင်းတိမ်နိုင်ကြဘူး။ သူတို့က ၂ဝ%သော ဥစ္စာပစ္စည်းထဲမှာပဲ တဝဲဝဲလည်နေလို့ဖြစ်တယ်။ သင် ဘယ်လောက် လုနိုင်လိမ့်မလဲ။

၉ဝ-၁ဝနိယာမကို  စတင်အသုံးပြုလိုက်ပါ။
  ဒီလိုမှမဟုတ်ရင် မပျော်ရွှင်တဲ့နေ့ရက်ထဲ သင်ထာဝရ နစ်မွန်းနေပါလိမ့်မယ်။
----

မူရင်းရေးသားသူ--- Stephen Covey (Discover The 90/10 Principle)

နိုင်းနိုင်းစနေ (Friday, May 13, 2011)